Cromatografía Líquida

A Cromatografía Líquida de Alta Resolución é unha técnica de separación e caracterización de mesturas complexas amplamente empregada debido a súa versatilidade, e tamén polo seu amplo campo de aplicación en tódalas ramas da Ciencia.

Os compoñentes da mostra, previamente tratados e disoltos, son introducidos nun eluinte axeitado (fase móbil), e mediante a aplicación de altas presións son forzados a atravesar unha columna cromatográfica (fase estacionaria). Prodúcese desta forma unha retención selectiva dos analitos, e a resolución desta separación depende da interacción destes coa fase estacionaria e a fase móbil. A separación pode ser optimizada variando as mesturas ou composición da fase móbil, así como a natureza do recheo da columna.

Podemos clasificar a Cromatografía Líquida segundo o método de separación:

• Líquido, sólido ou de adsorción: Adsorción sobre a superficie da fase estacionaria
• Líquido: Reparto entre fases líquidas, unha móbil e outra estacionaria
• Fase enlazada: Reparto e / ou adsorción entre as fases móbil e enlazada
• Afinidade: Uso da estrutura de ligantes inmobilizados para unir bioselectivamente a proteína desexada

Unha vez separados, os compostos son detectados empregando un detector determinado, xerando un sinal característico que depende tanto do tipo de composto como da súa concentración. A representación gráfica do sinal fronte o tempo de retención dos compostos denomínase cromatograma.