Preparación de Mostras

O CACTI dispón en Ourense de varios equipos de preparación de mostras para a posterior análise de compostos por diversas técnicas. Entre eles:

• SISTEMA DE DIXESTIÓN ÁCIDA ACELERADA POR MICROONDAS.
  A dixestión por microondas é un dos procedementos máis habituais na preparación de mostras, por exemplo para a súa posterior análise por MPAES e ICP-MS.
  A mostra xunto cos ácidos adecuados introdúcese en vasos pechados, e para dixerila aplícase enerxía de microondas. Á temperatura de traballo a mostra degrádase total ou parcialmente. A disolución acuosa ácida obtida déixase arrefriar e fíltrase se fose necesario.
  As grandes vantaxes desta técnica consisten na posibilidade de controlar de forma precisa certos parámetros como a temperatura, e poder dixerir a mostra en tempos moi reducidos.

• EXTRACCIÓN ACELERADA CON DISOLVENTES (ASE).
  Mediante este sistema podemos realizar extraccións de mostras sólidas en moi pouco tempo, empregando volumes de disolvente inferiores ós empregados nas técnicas tradicionais de extracción.
  A mostra sólida colócase nun dispositivo que se sela, énchese con disolvente e quéntase a temperatura maior que o punto de ebulición do disolvente, xerando un gran aumento de presión na cela. Durante o tempo de extracción parte do líquido vaise recollendo nun vial. Ao final da extracción, o extracto expúlsase da cela con nitróxeno e recóllese xa filtrado nun vial.

• EVAPORADOR TURBOVAP
  É un evaporador/concentrador, capaz de eliminar diferentes disolventes mediante nitróxeno. Permite a concentración simultánea de 24 mostras.